გიორგი შაქარაშვილის საქმეზე პროკურატურამ ჩვიდმეტივე დაკავებული პირის მიმართ აღკვეთის ღონისძიების სახით პატიმრობის გამოყენების შუამდგომლობით სასამართლოს მიმართა. აღნიშნულთან დაკავშირებით საქართველოს პროკურატურა განცხადებას ავრცელებს და მომხდართან ტრაგედიასთან დაკავშირებით დამატებით დეტალებს ავრცელებს.
გთავაზობთ პროკურატურის განცხადებას (შენიშვნა: ინიციალების გვერდით სრული სახელი და გვარი ჩვენს ხელთ არსებული მონაცემების მიხედვითაა შევსებული):
„საქართველოს პროკურატურა სამძიმარს უცხადებს გიორგი შაქარაშვილის ოჯახს და ახლობლებს! ღრმა მწუხარებას გამოთქვამს მომხდარი ტრაგედიის გამო.
საქართველოს პროკურატურამ, გიორგი შაქარაშვილის გარდაცვალების საქმეზე შინაგან საქმეთა სამინისტროს მიერ ჩატარებული გამოძიების შედეგად, მოპოვებული მტკიცებულებების საფუძველზე დაკავებულ ჩვიდმეტივე პირს წარუდგინა ბრალდება ორი ან მეტი პირის მიმართ განხორციელებული ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის და ჯგუფურად თავისუფლების უკანონო აღკვეთის ფაქტებზე, საქართველოს სისხლის სამართლის კოდექსის 126-ე მუხლის პირველი პრიმა ნაწილის „ბ“ და „გ“ ქვეპუნქტებით, 225-ე მუხლის პირველი და მე-2 ნაწილებით და 143-ე მუხლის მე-3 ნაწილის „ა“ ქვეპუნქტით“.
