მილანის მოდის კვირეულზე გამართულ GUCCI-ის 2020 წლის გაზაფხული/ზაფხულის კოლექციის ჩვენებამ საზოგადოებისგან ორაზროვანი გამოხმაურება მიიღო. მათ შორის ამ ფაქტმა დიდი დაინტერესება საქართველოშიც გამოიწვია, თუმცა განსხვავებული აქცენტებით.
რამ მიიქცია საერთაშორისო მედიის ყურადღება?
ჩვენებაზე ერთ-ერთი წამყვანი ხაზი ფსიქიატრიული კლინიკის პაციენტებისთვის დამახასიათებელი უნიფორმები იყო - თეთრი კოსტიუმები, შემბოჭავი პერანგები და მჭიდროდ მოჭერილი ქამრები. სწორედ ეს ფაქტი გააპროტესტა საჯაროდ მოდელმა აეშა ტან-ჯოუნსმა, როდესაც პოდიუმზე გამოსვლისას მაყურებლების წინ ხელები აღმართა და ხელისგულებზე დატანილი წარწერა გამოაჩინა:
"ფსიქიკური ჯანმრთელობა მოდა არ არის".
ჩვენების შემდეგ მოდელმა თავის ინსტაგრამ გვერდზე პოსტიც გამოაქვეყნა, რომელშიც უფრო ვრცლად ახსნა თავისი ქმედების მიზანი:
"როგორც ხელოვანისთვისა და მოდელისთვის, რომელსაც თავადაც გამოუცდია მენტალურ ჯანმრთელობასთან დაკავშირებული პრობლემები; ასევე, როგორც იმ ადამიანების ოჯახის წევრისთვისა და ახლობლისთვის, რომლებზეც დეპრესიამ, შფოთვამ, ბიპოლარულმა აშლილობამ და შიზოფრენიამ დიდი გავლენა იქონია, ძალიან მტკივნეული იყო, როდესაც ისეთმა დიდმა სამოდელო სახლმა, როგორიცაა GUCCI, წუთიერი ყურადღების მისაქცევად მსგავს ხერხს მიმართა".
ამ განცხადებას მედიაში იმდენად დიდი გამოხმაურება მოჰყვა, რომ მალევე სამოდელო სახლის კრეატიულმა დირექტორმა, ალესანდრო მიკელემაც გაავრცელა განცხადება, რომელიც ირიბად სწორედ მოდელის პროტესტის ერთგვარი პასუხი იყო:
"კონცეფციაზე მუშაობისას ადამიანებსა და უნიფორმებზე ვფიქრობდი. უნიფორმა გბოჭავს და გზღუდავს - ის გართმევს პიროვნულობას და გაიძულებს დინებას მიჰყვე".
მიკელემ ისიც განაცხადა, რომ ეს უნიფორმები მხოლოდ ერთგვარი პოლიტიკური გზავნილისთვის შექმნა და ისინი არ გაიყიდება, მიუხედავად იმისა, რომ ჩვენებაზე ოთხმოცდაათამდე კოსტიუმი იყო წარმოდგენილი.
რაზე წერდა ქართული მედია?
ამ ერთი მხრივ სკანდალურმა მოვლენამ, რომელმაც ფსიქიკური ჯანმრთელობის მსგავსი მნიშვნელოვანი პრობლემის კომერციალიზაციის საფრთხეზე გააკეთა აქცენტი, მოდის ინდუსტრიის ფარგლებს გარეთაც გამოიწვია მწვავე განხილვები. ამ ფაქტით ქართული მედიაც დაინტერესდა, თუმცა არანაკლები ყურადღება დაუთმო სხვა დეტალსაც - შოუში სომეხი გოგოს გამოჩენას.
არმინე არუთინიანი 23 წლის დიზაინერი და მხატვარია, რომელიც ერევანში ცხოვრობს. ის არ არის პროფესიონალი მოდელი და GUCCI-ს ჩვენებაზეც პირველად წარსდგა. მიუხედავად იმისა, რომ ამ ფაქტით საერთაშორისო მედია დიდად არ დაინტერესებულა და სხვათა შორის, არც სომხურ გამოცემებს მიუქცევიათ დიდი ყურადღება (რაშიც მარტივად დარწმუნდებით, თუ მის შესახებ ინტერნეტში სანდო წყაროების მოძიებას ეცდებით), მის შესახებ ბოლო დღეებში ქართულ ონლანგამოცემებსა თუ სოციალურ ქსელებში აქტიურად საუბრობენ.
განხილვის მთავარი საგანი არმინეს "უჩვეულო" გარეგნობა აღმოჩნდა: ბევრის აზრით, ის არანაირად არ შეეფერებოდა სილამაზის სტანდარტებს და ამასთან დაკავშირებით სიამაყით არაერთი ხუმრობაც მოიფიქრეს. ამ შეფასებების შთამაგონებელი პირველ რიგში სწორედ მოდის ინდუსტრიაა, რომელიც ათწლეულების განმავლობაში ამკვიდრებდა სილამაზის ხშირ შემთხვევაში სრულიად მიუღწეველ ტენდენციებს, რის გამოც ადამიანების უმეტესობისთვის ბუნებრივად დამახასიათებელი სხეულის განხვავებული ფორმები, ნაკვთები თუ ზომები ავტომატურად "სიმახინჯედ"' ითვლებოდა. ამას ცხადყოფს კიდეც ბოლო წლებში ბულემიის, ანორექსიისა თუ სხვა კვებითი დარღვევებისა და პლასტიკური ქირურგიის წარმოუდგენლად მაღალი მაჩვენებელი: ადამიანებს აღარ აკმაყოფილებთ საკუთარი სხეული და ყველაფერს აკეთებენ, რომ სილამაზის სტანდარტების მიხედვით აღიარებული სასურველი ფორმები შეიძინონ.
 |
| მოდელები GUCCI-ის 2020 წლის გაზაფხული/ზაფხულის კოლექციის ჩვენებაზე. |
ამის მიუხედავად, ვისაც მოდის ბოლოდროინდელი ტენდენციებისთვის ერთხელ მაინც შეუვლია თვალი, იცის, რომ მოდის სამყარომ საკუთარი თავის უარყოფა დაიწყო: ახლა მოდური სწორედ მანამდე მკაცრად შექმნილი წესების რღვევა და დაუნდობელ სტანდარტებთან დაპირისპირებაა.
დღეს დიზაინერისა და მოდის სახლის გაბედულ ხედვაზეა დამოკიდებული, თუ რა ჩაითვლება "სილამაზედ": პოდიუმისთვის უკვე მანამდე უპირობოდ აკრძალული ჭარბწონიანი მოდელებიც კი აღარ არის გასაკვირი. თუმცა, მოდის ინდუსტრია მაინც არ გამხდარა ყველასა და ყველაფრის მიმართ სოლიდარული და ასეც რომ ყოფილიყო, ასე უცებ ვერ გაქრებოდა წარმოუდგენელი ძალაუფლების მქონე მჩაგვრელი წარმოდგენები მხოლოდ იმ "ერთადერთ" და "ჭეშმარიტ" სილამაზეზე, რომლის ფლობის უფლებაც რჩეული უმცირესობის ხვედრია. სწორედ ამის ნათელი მაგალითია არმინე არუთინიანის ირგვლივ ქართულ მედიაში ატეხილი ისტერია, რომელსაც არმენოფობიაც შეერწყა: სტანდარტული ფემინური სილამაზისთვის არადამახასიათებელი ნაკვთები სომხური წარმოშობის "ულამაზობას" დაბრალდა
